இலங்கை வீதிகளில் அமுலுக்கு வரும் வேக வரம்புகள்

இலங்கை வீதிகளில் வேக வரம்புகள் தொடர்பான தேவையான விதிமுறைகள் அடங்கிய வர்த்தமானி விரைவில் வெளியிடப்படும் என போக்குவரத்து இராஜாங்க அமைச்சர் லசந்த அழகியவன்ன தெரிவித்துள்ளார்.

வீதி விபத்துக்களை குறைக்கும் நோக்கில் வர்த்தமானியை எதிர்வரும் இரண்டு வாரங்களுக்குள் வெளியிடுவதற்கு போக்குவரத்து அமைச்சு எதிர்பார்ப்பதாக இராஜாங்க அமைச்சர் தெரிவித்தார்.

2023 ஆம் ஆண்டில், 2,214 வீதி விபத்துக்கள் பதிவாகியுள்ளன, இதன் காரணமாக 2,321 பேர் இறந்துள்ளனர். ஜூன் 30 ஆம் திகதி வரை, இந்த ஆண்டு மொத்தம் 1,103 வீதி விபத்துகள் பதிவாகியுள்ளன.

இதில் 1,154 பேர் உயிரிழந்துள்ளனர். இப்பிரச்னைக்கு தீர்வு காண, வீதி விபத்துகளை குறைக்கும் நோக்கில் போக்குவரத்து அமைச்சகம் பல்வேறு திட்டங்களை செயல்படுத்தி வருவதாக அமைச்சர் குறிப்பிட்டுள்ளார்.

அத்தகைய ஒரு நடவடிக்கைக்காக வீதிப் பாதுகாப்புக்கான தேசிய சபை, இலங்கை பொலிஸாருக்கு தேவையான வேகக் கட்டுப்பாட்டு உபகரணங்களை கொள்வனவு செய்வதற்காக 50 மில்லியன் ரூபாவை ஒதுக்கியுள்ளதென இராஜாங்க அமைச்சர் கூறியுள்ளார்.

எதிர்வரும் வாரங்களில் புதிய வீதி வேக வரம்பு விதிமுறைகளுடன் கூடிய வர்த்தமானியை போக்குவரத்து அமைச்சு வெளியிடும் என அவர் மேலும் தெரிவித்துள்ளார்.

போக்குவரத்து இராஜாங்க அமைச்சர் லசந்த அழகியவன்ன ஜனாதிபதி ஊடக மையத்தில் நேற்று நடைபெற்ற செய்தியாளர் சந்திப்பில் இதனை தெரிவித்துள்ளார்.