காதலிக்க மறுத்த சிறுமி; தீ வைத்து தப்பியோடிய காதலன்

தூத்துக்குடி மாவட்டம் எட்டையபுரம் அருகே உள்ள இளம்பவனம் கிராமத்தை சேர்ந்த ஒரு பெண், தனது கணவரை விட்டு பிரிந்து குழந்தைகளுடன் பரமக்குடியில் வசித்து வந்துள்ளார். இந்த நிலையில், அவரது 17 வயது மகளும், அதே பகுதியை சேர்ந்த சந்தோஷ் என்ற இளைஞரும் நண்பர்களாக பழகி வந்தனர்.

கடந்த 3 ஆண்டுகளாக நட்பாக இருந்த இவர்களின் உறவு, பின்னர் காதலாக மாறியதாக கூறப்படுகிறது. இவர்கள் காதலிக்கிறார்கள் என்பது குடும்பத்தினருக்கு தெரிய வந்ததும், இருவரின் உறவை உறவினர்கள் கடுமையாக எதிர்த்துள்ளனர். இதனால், சிறுமி சந்தோஷிடம் இனிமேல் நண்பர்களாகவே இருப்போம் என கூறியதாக தகவல் கிடைத்துள்ளது. ஆனால், இதை ஏற்க மறுத்த சந்தோஷ் தொடர்ந்து சிறுமிக்கு தொந்தரவு செய்து வந்ததாக கூறப்படுகிறது.

சிறுமியின் தாய் பரமக்குடி போலீஸ் நிலையத்தில் சந்தோஷுக்கு எதிராக புகார் அளித்ததோடு, தனது மகளின் பாதுகாப்புக்காக அவளை பாட்டியின் வீட்டில் அனுப்பி வைத்துள்ளார்.

இந்த சூழலில், கடந்த 23ஆம் தேதி சிறுமியின் அலறல் சத்தம் கேட்டு அக்கம் பக்கத்தினர் உள்ளே சென்று பார்த்தபோது, தீப்பற்றி எரியும் நிலையில் சிறுமி இருப்பதை கண்டனர். உடனடியாக தீயை அணைத்து, அவளுக்கு முதலுதவி வழங்கியதும், தூத்துக்குடி அரசு மருத்துவமனைக்கு அனுப்பி வைத்தனர்.

வைத்தியசாலையில் சிகிச்சை பெற்று வந்த சிறுமி, போலீசாருக்கு அளித்த வாக்குமூலத்தில்,
“சந்தோஷ் தொடர்ந்து காதலிக்க கோரிக்கை வைத்தார். அதை மறுத்ததனால், அவரும், அவரது நண்பர் முத்தையா என்பவரும் சேர்ந்து என்னை மண்எண்ணெய் ஊற்றி தீ வைத்தனர்” என தெரிவித்துள்ளார்.

சிறுமியின் வாக்குமூலத்தின் அடிப்படையில், போலீசார் சந்தோஷ் மற்றும் முத்தையா ஆகிய இருவரையும் கைது செய்து, வழக்குப்பதிவு செய்துள்ளனர்.

இந்த சம்பவம் சமூகத்தில் பெண்களுக்கு எதிரான வன்முறையின் தீவிரத்தையும், இளைஞர்கள் மனநிலையில் ஏற்படும் மாற்றங்களையும் வெளிப்படுத்துகிறது. இத்தகைய குற்றங்களை தடுப்பதற்காக, குழந்தைகள் பாதுகாப்பு சட்டங்களை வலுப்படுத்துதல், பெண்கள் பாதுகாப்பு தொடர்பாக விழிப்புணர்வு ஏற்படுத்துதல் உள்ளிட்ட நடவடிக்கைகள் அவசியமாக உள்ளது.